У межах акцыі «Кожная пятніца – роднае, сваё» для чытачоў раённай цэнтральнай бібліятэкі прайшла віктарына «Смак роднай мовы». Гэта быў чарговы крок да таго, каб мы, беларусы, яшчэ больш палюбілі і даведаліся пра сваю краіну, свае традыцыі і сваю мову.
Гульня пабудавана так, каб аб’яднаць веды пра розныя аспекты Беларусі. Мы пачалі з пытанняў пра нашы водныя скарбы. Напрыклад, ці ведаеце вы, якое возера з’яўляецца самым глыбокім, якое самае вялікае па плошчы ў Беларусі? Гэтыя пытанні дапамагаюць лепш зразумець багацце нашых вод. Пытанні пра папулярныя беларускія музычныя гурты прымусілі ўсіх задумацца і падзяліцца сваімі ўлюбёнымі выканаўцамі. А сапраўднай «смачнай» часткай сталі заданні пра традыцыйныя беларускія напоі. Колькі іх толькі ёсць, і кожны са сваёй гісторыяй!

Не абышлі і тэму прамысловасці. Гаварылі пра паспяховыя беларускія прадпрыемствы, пра тыя, што ствараюць прадукцыю, якой мы ганарымся. Таксама былі пытанні пра адміністрацыйнае дзяленне, што дапамагае лепш арыентавацца па карце нашай радзімы.
І, вядома ж, мова! Мы падрыхтавалі лінгвістычныя выпрабаванні. Трэба было перакладаць словы з рускай мовы на беларускую і наадварот. Гэта выдатная магчымасць асвяжыць свае веды роднай мовы.
Такія сустрэчы сапраўды напамінаюць пра тое, як важна ведаць і шанаваць сваё, роднае.